ഞാന്‍ +2 വിനു പഠിച്ചിരുന്ന കാലം. ഒരു ദിവസം വൈകിട്ട് ഞാന്‍ വായനശാലയില്‍ ഇരിക്കുകയാണ്‌.എനിക്ക് പോകാനുള്ള ബസ് വരാന്‍ ഒരു മണിക്കൂര്‍ കൂടി ഉണ്ട്.ഞാന്‍ പത്രങ്ങള്‍ നോക്കി അങ്ങിനെ ഇരുന്നു.പെട്ടെന്ന് ഒരാള്‍ എന്‍റെ പുറത്തു തട്ടി.ഞാന്‍ തിരിഞ്ഞു നോക്കി.ഒരു പ്രായം ചെന്ന ആള്‍.അദ്ദേഹം എന്നോടു വെളിയിലേക്ക് വരാന്‍ പറഞ്ഞു.ഞാന്‍ കൂടെ ചെന്നു.
"മോനെ...എപ്പോഴാ ബസ് വരിക..? "
എങ്ങോട്ട് പോകാനാണ് ?
" എപ്പോഴാ ബസ് വരിക....? " അയാള്‍ വീണ്ടും അതെ ചോദ്യം ആവര്‍ത്തിച്ചു.
എങ്ങോട്ടാണെന്ന് പറഞ്ഞാലല്ലേ പറയാന്‍ കഴിയു.
എന്നെ നോക്കി കുറെ പെണ്‍കുട്ടികള്‍ ബസ് സ്റ്റോപ്പില്‍ നിന്ന് ചിരിക്കുന്നുണ്ടായിരുന്നു.ഇയാള്‍ക്ക് എന്തെങ്കിലും കുഴപ്പം ഉണ്ടാകും എന്ന് കരുതി ഞാന്‍ പിന്നീടൊന്നും പറയാതെ അകത്തേക്ക് പോയി.ഞാന്‍ അവിടെ പോയി ഇരുന്നു.ഞാന്‍ വെളിയിലേക്ക് നോക്കി.അയാളെ കണ്ടില്ല.പെണ്‍കുട്ടികള്‍ എന്നെ നോക്കി ചിരിക്കുന്നുണ്ടായിരുന്നു.
ഇവര്‍ക്കെന്താ വേറെ പണിയില്ലേ....ഞാന്‍ മനസ്സില്‍ കരുതി.
ഞാന്‍ വീണ്ടും പത്രം വായന തുടര്‍ന്നു.പെട്ടന്ന് എന്‍റെ കണ്ണ് തൊട്ടടുത്ത പേജിലേക്ക് തിരിഞ്ഞു.
എന്‍റെ അടുത്തു വന്ന ആ ആളുടെ ഫോട്ടോ മരണ കോളത്തില്‍.ഹൃദയാഘാതം മൂലം മരണപ്പെട്ടു എന്ന വാര്‍ത്തയും.ഞാന്‍ വേഗം വെളിയിലേക്ക് ഓടി ചെന്ന് നോക്കി.അവിടെയെങ്ങും അയാളെ കണ്ടില്ല.
ആ പെണ്‍കുട്ടികള്‍ അപ്പോഴും എന്നെ നോക്കി ചിരിക്കുന്നുണ്ടായിരുന്നു.
അതില്‍ എന്നെ അറിയാവുന്ന ഒരു കുട്ടി എന്നോടു ചോദിച്ചു.
" എന്താ അശ്വിന്‍ ചേട്ടാ....വട്ടായോ.... ? "
ഞാന്‍ എന്താണ് പറയേണ്ടത് എന്നറിയാത്ത ഒരു അവസ്ഥയിലായിരുന്നു.
ഒന്നും പറയാതെ ഞാന്‍ അകത്തേക്ക് നടന്നു.
******************************
.jpg)
